عن الصحاب سألوني
عن الصحاب سألوني، قلت: الصحاب أحوال
ده صاحب يصون العشرة، ولو جار الزمن ما مال
وده صاحب يبيع الود، لو شاف المكسب ينال
وده صاحب يشيلك في قلبه، ولو ضاقت عليك الحال
في صاحب يقولك: يا أنا، ويعتبر ودك راس مال
وفي صاحب همه نفسه، ومصلحته فوق كل حال
وفي صاحب وقت الحاجة، تلاقيه سابق السؤال
وفي صاحب وقت الشدة، يغيب ولا يسأل سؤال
وفي صاحب حنانه أب، وسنده وقت الضيق جبال
وفي صاحب شبه أخوك، وجوده في حياتك راس مال
وفي صاحب ضحكته شمس، ترد الروح لو طال الليال
وفي صاحب خلف ابتسامته غدر، مستخبي ألف احتمال
وفي صاحب يشوف نعمتك، يدعي لك ربنا بالوصال
وفي صاحب يحسد خطوتك، ويتمنى عثرتك قبل المنال
وفي صاحب يفرح لفرحتك، كأن الخير جاله في الحال
وفي صاحب نجاحك يوجعه، ويشوف فرحتك عليه وبال
وفي صاحب لو تهت يوم، يدلك على درب الاعتدال
وفي صاحب تايه في دنياه، وما يعرفش طريق للوصال
وفي صاحب يهديه الزمن، فيرجع للحق بعد جدال
وفي صاحب يطلب رضاك، ولا ينتظر منك جزاء ولا نوال
وفي صاحب يضحكك وقت حزنك، ويهزم بالضحكة أثقال
وفي صاحب يحول همك فرحة، ويخلي للحزن محال
وفي صاحب يحفظ سرك، ولو بينكم يوم جدال
وفي صاحب لو غبت عن عينه، يذكرك بالخير في كل حال
لكن يا صاحبي اسمع، الصحبة مش مجرد أقوال
ولا كثرة ضحك وسهر، ولا صورة ولا اتصال
الصحبة موقف وقت المحنة، وسند وقت ما تميل الجبال
وعهد يتصان في الغيبة، قبل ما يظهر في الوصال
واللي يخون العشرة مرة، ما تنتظر منه اعتدال
سيبه لطريقه في هدوء، ولا تدخل معاه في جدال
فاللي باعك وقت ضيقك، ما يستاهلش منك سؤال
واللي صانك وانت غايب، ده يتشال فوق الراس شال
الصاحب الجدع مش اللي يملأ حياتك بالكلام
ده اللي وقت ما تنكسر، يلمك ويهدي الآلام
واللي لو شاف دمعتك، يحس بيها قبل الكلام
زي لو الدنيا ضاقت، يقول لك: انا هنا… ومش هسيبك للظلام
فيا صاحبي خليك وفي، فالوفا من أغلى الخصال
وخلي قلبك للصحبة بيت، وللغدر فيه ألف محال
مش كل من صافح يدك، يستحق القلب والوصال
فالناس معادن، والمواقف وحدها تكشف الرجال
وفي آخر العمر هتعرف مين كان صاحب ومين خيال
مين كان حضن وقت خوفك، ومين كان مجرد ظلال
هتفتكر اللي صان الود، واللي باعك لأجل مال
وتعرف إن الصاحب الحقيقي رزق… ورزقه من ربنا ما يزول ولا يمال
جمال الحجاوي 
مدونة أكاديمية العبادي للشعر والأدب والسلام 