كلمات
ـــــــــــــــــــــ
قصص الحياة حكايات
مالكم يا بنيادمين
ده لكل لفظ غايات
بس اللى يفهم مين
بين السطور ألغاز
بين الحروف اسرار
والشرخ فى البرواز
بيشوّه الأفكار
العبرة مش فى القول
العبرة فى اللى وراه
ياما كلام معسول
والسم من جوّاه
قالوا الكلام محشور
فى النفس له تبعات
ما تقعش فى المحظور
والعتبة ع النيّات
الكلمة طلق رصاص
بتصيب ولا تخيّب
والعقل جوه الرأس
واعقلها يا طيب
الكلمة جوه الجوف
بالحكمة مأسوره
والكلمة لو تتقال
تلعب بك الكورة
يابو الكلام موزون
ومين يعيش هيشوف
يا تجيب فى نفسك جون
يا تعيشها بالمعروف
كلمات
عبد الرحيم على
مدونة أكاديمية العبادي للشعر والأدب والسلام 