عبير الذكريات .. !!

كل اللى باقى لك …

عندى ..

من حبنا اللى فات 

فى صندوق الذكريات 

شوية حاجات 

لسه متعلقين ..

جوا القلب 

فوق جدار الأمنيات 

لابسين توب السكات

متعشمين ..

ف شوية حنين

نرجع ف يوم

نطوى بينا المسافات

ونرجع نعيش ..

ف توب التمنيات

تحت جناح بكرة ..

اللى جاى

طب .. ازاى .. ؟!

ولسه نار الفراق 

ولهيب الأشواق

ساكنين .. ف القلب 

اللى حب .. 

ولا …. طال

سنين طوال

واتجرحت …

فيه الأمانى 

بأشواك البعاد 

وسكاكين العناد

ف سكك المتاهات 

منت اللى بعت حبى

وجرحت بنار الفراق قلبى 

وعايزنى ارجع لك …

من تانى .. ؟!

أملا لك بحبى .. 

القنانى .. ؟!

وانسى جرحى ..

الأولانى .. ؟!

ودموع عينيا ..

السهرانين

ف ليل السهد .. 

والأنين 

وحرقة الآهات 

ف ليل السكات .. ؟!

أنا .. يا ما ..

صبرت كتير ..

على جرحك

ويا ما … 

كت كتير بصارحك 

بالنار اللى قايدة ..

جوايا 

بعذاب قلبى ..

وأسايا

بدموع قلبى ..

وحكاياته

بألامه وآهاته 

وعزف حبى ..

ع النايات 

بس انت .. 

كت قاسى 

وانا ف حبك …

ليل نهار بآااااسى 

واصبر ف روحى 

رغم لوعة جروحى 

وعيون الشمتانين

وكلامهم والأنين 

وأفلامهم .والروايات

وأقول لقلبى …

فات الكتير 

وبكرة مسيره يرجع ..

من تانى

يفرش لك الأرض …

ورد … وامانى 

ونرجع نعيش حبنا 

ف ليالى الفرح ..

والهنا 

ونحيي ف قلوبنا…

عبير … الذكريات

الشاعر / منصور أبوقورة