قصيدة بعنوان 

(هاتحسدونا؟؟؟؟!!)

هاتحسدونا على إيه. 

هاتحسدونا على الغربه

ال طفحين فيها الكوته.  

 ولا على الضحكه  

ال جوانا مكبوته

ولا على المر ال شاربينه

وفاكرينها………

إنها قهوة مظبوطه. 

هاتحسدونا على إيه.  

على العمر ال اتسرسب.  

من غير ما نحس بالعد.  

عدا علينا كام يوم وكام

شهر ساعات ودقايق وثواني.  

وطريق طويل بيتمد.  

تعالوا جربوا وشوفوا

القهر والذل وحيطان سد.  

تعالوا وشوفوا العبد 

وتحكماته في العبد.  

تعالوا وشوفوا كام 

باب في وشنا بيتسد.   

تعالوا وحسوا بالآه 

خارجه من الصدر بتشرخ. 

وبتوجع ودموع بتذرف

على الخد.  

هاتحسدونا على إيه. 

على لقمة متغمسه بالصبر.  

على عيشة العزابي.  

ال عايش كأنه في القبر. 

على نومة في ليلة البرد.  

ولا نهار بصيفه كالجمر.  

ولا على ضحكه مخنوقه. 

ولا على طبخه محروقه.  

هاتحسدونا على إيه.  

بتقولوا علينا مسافرين.  

عايشين ومعاهم ملايين.  

محروق أبو الفلوس.  

مع عيشه زي الطين.  

محروق القرش ال بنجيبة.  

مع ناس بتعبنا مش حاسيين 

لاذقنا زي ماذقتم الحلو

مع أولادكم ولا عرفنا 

هو إيه يبقى الحضن في

حضن نسوانكم.  

ولا شفنا زي ما شفتم. 

الحلم في عز أحلامكم.  

جربتم القهر كام مرة.  

جربتم تتوجعوا كام مرة

جربتم تحضنوا الحزن  

في كل أيامكم.  

هاتحسدونا على إيه.  

على شيبة الشعر في 

الراس قبل أوانه.  

 ولا على التجاعيد 

 ال المرسومه في الوش. 

الممزوجه فيه كل ألوانه.  

ولا على الضهر المحني 

 ولا على العقل التايه. 

الناسي حتى أزمانه.  

هاتحسدونا على إيه. 

على ال مات وممشيتش

حتى في جنازته.  

ولا على طفلك ال ماعرفتش. 

هي فين تبقى مدرسته.  

ولا على الأهل والأولاد 

والصحبة واللمة وزوجة. 

تعبانه من شيل الهم 

على أكتافها ماتعرف عن

إبنك هي إيه تبقى تربيته.  

 هاتحسدونا على إيه……..

25/11/2023

(ترنيمات وخواطر.بقلم……….)

(شاعر العاميه/خيرى حسنى.)