الزمن .. الجميل .. !!

 

راح فين الزمان ..

اللى كان .. 

مالى قلوبنا ..

ورد الحنان 

وياسمين الأمان ..؟!

راحت فين ..

أيامنا الحلوة .. 

اللى كات .. غنوة 

معطرة .. قلوبنا ..

ومنورة .. المكان .. ؟!

راح فين الحب ..

وورد الأمانى .. ؟!

اللى كان مالى قلوبنا .. 

فرح وأغانى

والبسمة اللى كات ..

ف طعم القطايف

نايمة ع الشفايف ..

أجمل بستان .. ؟!

راحت فين ليالينا .. ؟!

اللى كات بتسقينا ..

حضن أمان مدفينا 

ومالية الدار .. 

ورد .. وريحان 

راحت فين …

شجرة اللمة والعزوة .. ؟!

والكلمة الحلوة ..

ونهر الحب اللى كان ..

بيسقى الأهل .. والجيران

راح فين توب الشهامة ..

وشال .. الأيامة .. ؟!

اللي قماشته كات ..

حرير .. ودبلان 

راحت فين ..

كاسات النخوة .. ؟!

اللى كات بتترع قلوبنا .. 

تحت شجرة العلية ..

وهى حاضنة الجميع 

ف خضرة وضليلة 

نسرج قناديل الوفا 

ونفرش مناديل الصفا .. 

ع الرملة .. أشكال وألوان

نلعب ف ضى القمر 

وضحكة القدر

مع النرجس .. الوسنان

لابسين توب الحيا ..

بنات .. ويا صبيان

نغزل ضفاير الهوى 

ع مغازل الشوق ..

والأدب .. تيجان 

ويا القمر السهران 

راحت فين ..

أيام الشقاوة .. ؟!

اللى كات لابسة ..

عباية .. الحشمة 

والكلمة الحلوة ..

ترفرف بورد الحكمة 

ف قلوبنا …

حجر .. صوان 

راح فين …

الزمن الجميل .. ؟! 

اللى كان فارد جناحه ..

علينا .. بالأمان .. !!

 

الشاعر / منصور أبوقورة