الرئيس القادم

 

بالقانون ياثوريين*

بالقانون يامحتجين*

السلطة مش ع الحرية*

واحنا هنفضل محترمين*

فى حرامية هربانين*

هربوا ع البريطانين*

         *****

ماترجعش الاراجوزات*

مجلس شعبك بانتخابات*

احسن تيجى الندابات*

تلطم ويانا الخدين*

       *****

اكنس وامسح بالقانون*

واللى سرقنا مش مجنون*

وعيونك خلى عليها عيون* 

لكن مش ع التعبانين*

        *****

محتاجة القوانين تعديل*

قبل مانفس المصرى تشيل*

براحه من غير تهليل*

وانتم فاهمينا وعارفين*

        *****

القاضى ابنه مش لازم *

يطلع قاضى كبير فى محاكم*

والعامل ابنه بيزاحم *

ع اللقمة ويجبها منين*

      *****

ياللى مابتدفعش ضرايب*

وانت معبى بنوك وزكايب*

والنايبه اما تكون نايب*

تضحك ع الشعب بقرشين*

         *****

ليه بيودوا فلوسهم بره*

ويسيبوا ف قلوبنا الحسره*

 أسأل عنه انت واتحرى* 

 ‏وأسأل مين جاب له البلايين*

        ‏ *****

 ‏للأمى كلمه تستاهل *

 ‏والاعمى ممكن يتفاعل*

 ‏ماتخدش الحكمه من جاهل* 

 ‏لكن ممكن م المجانين*

          ‏*****

 ‏والتمثيل مش ف حساباتنا*

 ‏ولا دنيا التعتيم ابياتنا*

 ‏عايزين نفضل باقى حياتنا *

 ‏شبعانين ومحترمين*

        ‏*****

 ‏الاعلام والعلم الواعى*

 ‏وثقافة لمبدع بتراعى*

 ‏هما دروع الامن بتاعى*

 ‏واحنا شبعنا م التلوين*

 ‏ *****

 ‏خضر عوض

 ‏

 ‏