دابا تشوف…(زجلية مغربية)
بقلم: حميد النكادي.
علاه أنا
فالدنيا ما
كان لي مكان؟!!!!!
ما شافوني عيون
ما سمعوني ناس
ما جاب
خباري لسان …..
ما نصفني
ما عطاني
هاد الزمان
حسبوني ديما
مشرط الحنكان(عبد)
كي الليل
كي النهار
على بابي
تتراكم الأحزان….
نشوف بعيني
كي نبغي نهضر(نتكلم)
نلقى راسي بلجام…
شكون يكتب
لي حجاب
يترجم لكلام ….
لغة الصمت جمرة
تحرق الصدر
يكثر التخمام ….
ما تحسبوني
هبيل مشرد
ولا بوهالي
ندخل و نخرج
في الكلام …
ضيق الحال
ماشي عيب
ماشي حرام
داب شي نهار
دور النوبة
وتزهى الأيام
و تشوف بعينيك
وجهي لاخر
يبان ليك مزيان
بعد ما
كنتِ حاسبني
خرقة تمسح
الرجل ولقدام …
دابا تشوف
وتعرف المعدن
باش مسقي
هاد الانسان ….
4ماي2023. Sète فرنسا..
ترانيم بحة الناي 