…………..( يا موزعين)……….
في كل لحظة بحبك واحس معنى القول
يامعيشاني في دربك وبقيت انا المسؤل
لو عيني تلمح عيوبك والحزن يلبسني
بقول انك بريئة وان انا المسطول
بتحرميني القوت ومركبي حرمان
بحرك ولسة طاغوط فوق الصدور بيبان
ياكل ماء له شطوط والشط عندي إختفى
والموج تملي يشوط محتاج يلاقي أمان
الخوف وباء وإنتشر وصاب كتير م البشر
بركان وثار في القمم في الوادي كله إنتشر
صبح الكلام في سكوت وسط الكفن بيموت
حتى الألم صامت بتوب صبره كفر
والآهه بين الضلوع مطلوقه ع الهادي
ياقلب رافض الرجوع ليه توهت في الوادي
لفيت عليك في النجوع متخبي فين قول لي
مستني ليه اني اجوع وتجيني وتعادي
يالفة الساقية امتى هتروي الغيطان
الدنيا مش باقية لكن ناقصها إيمان
انا اللي عايش بحبك ومسكني طينك
ليه مصممه تهيني وتقلبي الميزان
إسقيني من صدرك يا ام اللبن جاري
يامجوعاني في حجرك وخيرك تداري
خزاين الأرض عمرك وربنا قالها
أيام سنين العجاف كنت انت خير عالي
أرضك وليه تطرح للظلم يظلمني
في الخير ماليش مطرح في الشدة يصدمني
من دمي يملى خزاينه وانا حاجتي له أكتر
ويخدني أحمي مداينه قال ايه بقى يدينني
عيشني كل السنين على عمري أتحسر
من مرضي يصنع أنين من حاجتي أتعثر
بقى عمري كله كمين خايف أقع فيه
مع اني عايش فيه من ظلمة بتعصر
معقوله فيك النيل ولاتروي سكانك
في الصحره ألف دليل وبتوه في أحضانك
العدل تايه ليه ماعرفش يوم بابك
مع ان حلك فيه تلاقيه على أعتابك
متقدمة في الصف عايشه في توب الدين
وازهرك ياما كف الظلم ع الملايين
ليه ماتوزعيش العدل على كل أولادك
م الحلو ياخد نصيبه ومن الهموم له طين
يا ام الهرم والدين خلي العيال في العين
بس العيال باقين حراس ليوم الدين
بالحب ياما إشتروا الارض وترابك
ياحلوه ليه بالخوف طالبه الغرام واللين
ليه توزعي ظلمك على كل عشاقك
والفجر ليه منعاه يطلع في يوم جابك
ورافضة حتى الآه بقانون في يوم الوجع
خلي الوجع مساواه يرتاح بقى شبابك
ضميني على صدرك نفسي أزعق بعلو الصوت
واصرخ واقول عايزك وتحسي بالملاكوت
رضعت منك شبابي وحنان يخليني
ان غبت عني أعاتبك يا ام الأمان والقوت
فيك كبرت سنين وبقيت أسير أرضك
ياحلوة الحلوين بقى عرضي من عرضك
يابت دا انت الهوى والعشق والعاشقين
ولا يوم احس المرض إلا وكان عٓرٓضٍك
كتبت فوق الحيطان انت الهوى والدين
كل اللي حبك أمان وقلبي يبقى أمين
اما اللي خانك كيان محروم على قلبي
عايش ومهما ان كان في عيوني يبقى لعين
لو فاكرة وقت زمان وقت الحصاد تعطي
وتجوزي الغلبان ولا كنت يوم تهدي
في الساقية كان التور والناف على راسه
يمشي يلف يدور يتعب عشان ترضي
النيل وكان يبعت الخير على الأبواب
ويشيل لآخر الليل مناب لكل غياب
ويوزع اللي طاب بالعدل بين الناس
مايسيبش يوم محتاج ولاحتى في الأغراب
هي الطبيعية كدا العدل موازينها
فيها كان توب الرضا منقوش على جبينها
الحب بين القلوب الدين بيربطهم
والرحمة كان لها توب هي اللي بتزينها
يابت قومي بقى خدي كل أحبابك
فرقي بين العدا وبين اللي في ترابك
إزرعي كل القديم مع الجديد أرضك
يطرح سنابل خير محصوله في جرابك
يا مأكلاني اللقمة متغمسة بعرقي
أزّوَر بميت لكمة على جسمي وتشقي
طول عمري انا الفارس والقلب عاش أبيض
والخير حمولة الخيل وبتعرفي تنقي
سيبتي ميزانك ليه واتفرقوا الاخوات
والقسمة صبحت تيه وكتيرنا بقى شحات
ابن الحلال ترميه وابن الحرام توبك
بقى هو محسوبك بين الجفون بيبات
……..( شــــٕــعر )………
عبدالله السايح
ترانيم بحة الناي 