تاجر أعضاء بشرية .. للشاعر د . عمر عبد الجواد عبد العزيز

…(( تاجر أعضاء بشرية )) …..

صبحنا و صبح الملك لله

يا فتاح يا عليم

يا رزاق يا كريم

قرب يا فندي…. قرب يا بيه…..

أي حاجة عندي

..علي العربية بجنيه ..

صناعة محلية ..

مضمونة مليون الميه..

شجع منتج بلدنا

أنا بتاجر في أعضاء ولادنا

اشتري إتنين

و التالت هدية ….

عندي ضمير ع الزيرو

إستعمال خفيف

و لسه بخيروه

صاحبه رماه من سنين

لما جمع له قرشين

و صار للعدو نصيره…..

و عندي كتير غيره

ضمير ….. آخر ألاجا …..

بعد ما صاحبه

عرف خواجة

استغني عنه ….

و جه عندي…. بدله بتلاجة…..

و ضمير لموظف

… كان غلبان

إتنقل من الصحة للإسكان

مافيش يا دوب شهرين

و جه من يومين

.. بدله بسخان …

قرب يا فندي.

… قرب يا بيه. ……

أي حاجه عندي

..علي العربية بجنيه .

عندي قلوب…… ألوان

تتبدل من مكان لمكان

رقيق و حنين . مع الغني

و إسود و آسي ع الغلبان ….

و قلب تاني ..

يعشق النسوان

تزيد دقاته واحدة

لو لمح من بعيد واحدة

يصبح بيها متيم ولهان

بسلامته يعشق بره

و جوه البيت

حجر صوان ….

و قلب غيره……….فالح

وقت المصالح يتصالح

يحبك أووي لمصلحته

و بعد ما تنقضي مصلحته

تندم أوووي لمعرفته

و يعاملك كأنه حيوان……..

قرب يا فندي …

قرب يا بيه

أي حاجه عندي

.. علي العربية بجنيه …

عندي عيون بصاصة ……..

تندب فيها رصاصة

تجيب الشقة من جوة

و لأهل البيت… قناصة.. …..

و عندي كمان

.. أطول لسان

مستحيل …..

تقول علي صاحبه إنسان

ما يفرق بين

صراحة و وقاحة

و يلدغك…… كأنه ثعبان

و عندي لسان ..

عديم الإحساس

يخوض في أعراض الناس

و يستاهل ضربه بمداس

أو بين مطرقة و سندان ….

و معايا كبد مِتلَيٍِف

في مية الصرف بيصيف

و كمان مُخ متكيف

ببرشامة و بيرة و دخان…..

مين ياتري ينفعني

و لصوته ييجي يسمعني

و لا خلاص الكل مستغني

و عوضي…علي الرحمن…..؟؟

★★★★★★★★★★

د/عمر عبد الجواد عبد العزيز