مئوية بالشعر العامي في ذكري ثورة 25 يناير سنة 2011 . ( الذكري الثالثة عشر ) .

#من_دبوان_الحناوي

بعنوان :

(#حنفي_وحسان_وحكايات_الميدان) . 

تأليف د / عبد الرحمن فتحي الحناوي .

من مصر

الخميس ٣٥ من يناير ( كانون الثاني ) سنة ٢٠٢٤. ***************************** 

١ – سيب فاسك يا ( عبد العال ) وانتا كمان يا ( حسان ) * 

٢ – واجري معانا يلا ياخال بيقولوا ثوره في الميدان * 

٣ – فين الثوره يا ( متقال ) ؟ يلا نعدي علي (حمدان) * 

٤ – الثوار من بدري هناك في التحرير جُوّا الميدان * 

٥ – بيقولوا هات كل اللي معاك بسرعة يلا وطيروا طيران * 

٦ – هتلاقوا ناس كتير هناك فلاح عامل أو فنان *

٧ – وأطبا وعُلَما وحرفيين عارفين سكة الميدان *

٨ – ومهندسين ومدرسين وتلامذه من كل الألوان *

٩ – كلهم متحمسين عايزين بنهوا نظام َفسْدان *

١٠ – هو دا يا صاحبي الميدان بشر من كل الألوان * 

١١ – اللي ماسك يافطة عليها صورة تشبه الشيطان *

١٢ – وبيهتف وينادي ارحل يلا مالكش بينّا مكان *

١٣ – وادي أفندي لابس بدله وشايلينه شوية جدعان *

١٤ – بكلام مقنع جدا صوته عالي مزلزل الأركان *

١٥ – وشبابنا الثوار حواليه والزحمه مِاليه المكان *

١٦ – والكل بينصت إليه حكيم دا ولّا فصيح لسان *

١٧ – بص هناك يا (متقال) ست دي ولا انا غلطان *

١٨ – فيه شباب كتير حواليها ورِجاله أشكال والوان *

١٩ – اسمع بتقول إيه للناس عايزين نقضي على التِّعبان *

٢٠ – الكيل طافح بينا خلاص وانتا عن الفقير غفلان *

٢١ – بص معايا يا عبد العال مسرح كبير هناك وصوان *

٢٢ – وأغاني وأناشيد وطنيه كنا بنسمع عنها زمان *

٢٣ – (ع الدوار .. ع الدوار ) بيحمسوا بيها الشجعان *

٢٤ – دي ثوره بجد يا (متولي) يا مصر يا امي انتي الأمان *

٢٥ – وآدي ناس جايه هتصلي بعد ما رفعوا لنا الأذان *

٢٦ – جيب العواقب سليمة يارب واحفظ مصر يا حنّان *

٢٧- مش عاملين قيمه للشعب والمال في إيدين السلطان *

٢٨ – دي السلطة وأصحاب الثروة بيتحكموا في البلدان *

٢٩ – فاكرين ان الشعب دا ساكت وراضي جدا بالحرمان *

٣٠ – أصل الشعب دا صاحب سلطه ومش جاي طالب إحسان *

٣١ – وفسادهم استشرى وزاد وضاع العدل والميزان *

٣٢ – الثروة اتجوزت السلطه جواز العُمي مع الطرشان *

٣٣ – وصبْر الشعب دا طال عليهم حوّلوه لفقير عدمان *

٣٤ – ونشروا بكل بجاحه فسادهم بيعاملوه زي السكران *

٣٥ – يا مصر دا انتي عظيمه وشعبك المصراوي اصيل فنان *

٣٦ – أطياف الشعب كلها ملكك برا وجوا في الميدان *

٣٧ – وممثلين ومؤلفين جايين يشاركوا مع الفتيان *

٣٨- دي ثوره بجد والله يا (حنفي ) والشرطه سايبه لنا المكان *

٣٩ – أنا سامع صوت ضرب النار يلا على أقرب دكان *

٤٠ – هوا فيه دكان بابه فاتح دول قفلوا كل الييبان *

٤١ – ثوره بجد صحيح يا صاحبي وآدي قنابل الدخان *

٤٢ – المسيله للدموع الموجوده في كل مكان *

٤٣ – يا شعب مصر الثوره بدأت بشايرها تظهر هنا وتبان *

٤٤ – والورد اللي في جناين مصر فتح بس علينا ما هان *

٤٥ – لكن هان علي كل خسيس قتل شباب منهم جدعان *

٤٦ – الدم المصري ماهوش رخيص رخصتوه ياغيلان *

٤٧ – الحاشيه جنب الرئيس عاملين زي قروش وحيتان *

٤٨ – بيظهروا له ولاء وطاعه لكن ودوه في خبر كان *

٤٩ – بُكره كلهم يتحاكموا ويدوقوا الذل والخذلان *

٥٠ – ويتحاكم كل اللي قتلوا وضربوا نار في المليان *

٥١ – بص يا(حنفي) فوق طياره بتدور حوالينا دوران *

٥٢ – باين عليها جايه تصور كل حركه في الميدان *

٥٣ – أنا خايف هي اللي تكون سبب الضرب في الشجعان *

٥٤ – اتورطنا ولا بعدنا ؟ تعالي ندور علي ( حسان ) *

٥٥ – يمكن راح ناحية المتحف يستخبي من الدخان *

٥٦ – خَلْق كتير ليه جوه المتحف غزو دا ولا عدوان *

٥٧ – دول ثوار حقيقي يا صاحبي ولا ناس تايهه توهان *

٥٨ – اللي بينهب واللي بيسرق في الآثار ومش ندمان *

٥٩ – واللي فاكر نفسه بيفهم ثورة إيه يا جدعان *

٦٠ – خليك بس انتا مع نفسك مش هنسيب لحظه الميدان *

٦١ – الإجرام دا لازم يرحل وبُكره نحاكم الفسدان *

٦٢ – يلا ننادي بأعلي صوت انتا فين يا ( حسان ) *

٦٣ – فيه لَمّه شايفها هناك يظهر واحد مات كمان *

٦٤ – مين يعرفه يا رجاله بص معايا يا (حمدان ) *

٦٥ – جثة مين يلا تعالي دا فيه شبه من ( حسان ) 

٦٦ – آه .آه وألف آه ضربوك بالنار يا ( حسان ) 

٦٧ – دمك مش هيروح هدر والحرية للشجعان *

٦٨ – جيت تطالب بالحرية وتدافع عن جيل شقيان *

٦٩ – بقيت دلوقتي انتا الضحيه وروحك لسه في الميدان *

٧٠ – الليل دخل علينا واحنا مش هنروّح يا خلان * 

٧١ – يلا نطمن بقى أهالينا وبكرة نكمل في الميدان *

٧٢ – تروّح ليه هوا انتا صغير اوعي يقولوا عليك هربان *

٧٣ – دي الشجاعه لها أبطالها وانتا أبدا مش جبان *

٧٤ – الثوره لسه هتبتدي وأنا سامع آيات قرءان *

٧٥ – وشيخ هناك واقف مُلتحي بيخطب بفصاحة لسان *

٧٦- باللغه العربيه الفصحي وشكله سلفي يا ( حمدان ) *

٧٧ – والسياسه في نظره كانت رجس من عمل الشيطان * 

٧٨ – دلوقتي الأمور أهي بانت وانكشف اللي كان خفيان * 

٧٩ – شعللي يا شرارة الثورة واحرقي جموع الطغيان *

٨٠ – جايين لك من أول مره والأعداد في زيادة الآن *

٨١ – لاجل بلدنا مصرالحرة تتخلص من الطغيان *

٨٢ – طلع النهار وابتدت تظهر شمس الحرية وتبان *

٨٣ – واحنا حالفين هنا نستني من غير ما نسيب المكان *

٨٤- مر يومين وتلاته واحنا ما حدش قال انا بردان *

٨٥ – نور الحريه راح يظهر وبكره يدفي لنا الميدان *

٨٦ – وف لحظة الشعب صمت كله صمت زي صمت الحملان *

٨٧ – اسمعوا وانصتوا يا جماعة يلا حالا هيذيعوا لنا بيان *

٨٨ – والناس واقفه بتستني يقولوا إيه في البيان *

٨٩ – وبعد شويه ظهر عالشاشه اللي في أول الميدان * 

٩٠ – شخصيه الكل واثق فيها وبدأ يقرأ لنا البيان * 

٩١ – ( الرئيس قرر يتنحي ويترك الرئاسه كمان ) * 

٩٢ – والمجلس العسكري هُوا اللي هيحكم والشعب كان فرحان * 

٩٣ – الزغاريد طلعت والفرحة عمت ف أرجاء الميدان * 

٩٤:- والأحرار واقفين بيهنوا وياخدوا بعض بالأحضان *

٩٥ – والثوار قاعدين بيغنوا ويعيدوا أمجاد زمان *

٩٦ – خلعوا رئيس زي ما اتمنوا قوة إيه يا ولدان *

٩٧ – من غير حرب يلا اتهنوا هيعلي بسواعدكو البنيان *

٩٨ – ومصر حتبقى قد الدنيا رغم أنف كل جبان *

٩٩ – ابنوها بعزيمتكم يلا تستاهلوا مِيت ألف نيشان *

١٠٠ – ربنا يحفظ مصر كدوله لها قيمه بين البلدان *

١٠١ – ويكشف عنها الُغُمّه بسرعه وتعلا فوق كل الأوطان *

**** **** **** **** ****   

نشرت اول مرة يوم الجمعة الموافق 25 من يناير ( كانون الثاني ) سنة 2019 .

**************************