أبويا اللى صاحبنى 

ساب الدنيا وسابنى 

بعد ما زرع الحب فى قلبى 

بعد مانور بالخير دربى 

سابنى لبعده يوجعنى 

علمنى ان الدنيا بخير 

وانى أعيش دايماً للغير 

واتعامل دايماً بضمير 

ومابيعش حتى اللى يبيعنى 

أبويا قاللى ان الدنيا 

حلوة ومجنونة وفانية 

عيشى يابنتى كل دقيقة 

الدنيا فى فرحك ماتساعنى 

أبويا ابو ضحكة طلة 

قاللى الكره علة 

والشكوى لغير الله 

ضعف ورخص ومذلة 

وان فجأة سيبت الدنيا 

 ادعيلى ربنا يرحمنى 

سلوى محمود