البنت الحلوة الأمورة 

بضفاير وقصة على القورة 

البسمة بتضحك فى عيونها 

جوة الصورة وبرة الصورة 

سارقاها الدنيا ف أحضانها 

وشايفاها جنة بمقصورة 

بتقرى امبارح فى كتاب 

وبترسم بكرة ف سبورة 

قابلها الحب ودق الباب 

وهى فراشة صغيورة 

من نظرة عين رق وداب 

وقعت فى غرامه العصفورة 

فجأة اتقلب النور لضباب 

وبقت ع البعد مجبورة 

الكل فجأة بقوا أحباب 

عايزينها للمال مأجورة 

غصبوا عليها تبقى ف بيت 

زى الكنبة وزى الحيط 

زى الكرسى والأباجورة 

يجرى العمر يدوس على روحها 

والأفراح عليها محظورة 

عايشة وحيدة وسط جروحها 

وعيونها ذليلة ومكسورة 

مرايتها ملِت من نوحها 

عكست طير جناحاته مبتورة 

عاشت تبكى الحب ف يومها 

وتنام كل ليلة مقهورة 

ودى حكاية ياما عشناها 

حكاية بجد ومشهورة 

عن بنت حلوة وأمورة 

بضفاير وقصة على القورة 

سلوى محمود