أحمر وناشف يا بصل

إللي خايف منه حصل

فضل ينادي المكرفون

الاتنين بعشره يا عسل

يالا يا هنام ع السريع

الفرصه من إيدك تضيع

عمك ربيع ب الخير وصل

يالا يا صبيه بصل التقليه 

والسلطه والملوخيه

وخلطه المحشي الفرصه إن راحت ما ترجعشي

ويارتينا خدنا البصل وكنا خزناها

سعر البصل لم حصل

نافس في سعر الماس

بعد أما كان بالقفص

بدأوا يبعوه بالفص

مش نص ولا قيراط

والقصبه في الشتل

وصلت ل١٠٠٠ جنيه

وشوفوا الكيماوي راح يكلف إيه

وري وعزيق ورش للآفات 

و٩ شهور م السنا

وبصلنا جوه الخط

أول ما عرشه يحط

ح يجي تاجر ينط

ياخده بسعر التراب

ويقعد يقطع فيه

من بعد ما يخفيه

والسوق يحن إليه

يسأل عليه الزبون

يرجعه ب الكابون

والسعر عرض وطلب

وإحنا ب جد العرب

زي أما قال المثل

ب نعشق الممنوع

م الفجر لما العشا

والعربيه ب تنادي

يالا يا امو العيال

جايين وب نهادي

٢ ب عشره يابصل

والخمسه بالعشرين

إرمي يا ست الكسل

واجري الحقي الفرصه

من بكره سعر البصل

راح يدخل البورصه

وينافس الدولار

يالا يا مدام قبل الزحام

جايين عشان الغلابه

ومحاربه التجار

يومين يدوبك تلاته

وعمك ربيع أبو شحاته

ماحدش سمع له صوت

جرينا نسأل للفرصه منا تفوت

قالوا لنا إن البصل داب واختفى م السوق

أسبوع يا هانم بكتيره قولي إتنين

لقينا سعر البصل داخل علي الخمسين

وعليه خناقه وضرب ب النبوت

صدق المثل لما قال

فيه ناس تحب الغلا عشان ب تتربح

ب تعمل منه مكاسب

وتل مال وفلوس

وناس تبوس القدم عشان تسد الجوع

سعيد الضو