وحشاني قوي اللمه

والبوسه والضمه

والطبطبه علي الإيد

م الخاله والعمه

بيتنا إللي كان مزحوم

رغم إنه كان فدان

الكل بدري يقوم

قبل الأدان ب أدان

وبعد الصلاه نتلم

الأب ويا الأم

والأهل والخلان

والخاله جنب العم

فرشتنا حصيره سمار

قاعدتنا ف وسط الدار

٣ طبالي كبار

ومالينين ب الخير

وعيشنا كان ناشف

مش عيش بتاع الفرن

كان بيتنا زى الجرن

فيه الكانون والفرن

وحصيرة الجبنه

وزلعه فيها المش

وتخش جوه البيت

تلقي الزريبه غيط

فيها بقر وجاموس

وإتنين تلاته حمار

والوز ويا البط

غير الفراخ أنواع

بلدي علي رومي

وزغاليل حمام في الزلع

وأنا كنت آخر ولد

واخد نصيبي دلع

وكل الكلام طاعه

وكنت أقول لأمي

عايز غدايه فطير

تبص لي وتضحك

وتقولي يابني الضهر

مش باقي غير ساعه

وقبل ما أنطق بحرف

تقول من عيني حاضر

تروح تصلي الضهر

في جماعه في الجامع

تجي تلقي الغدا محطوط

الله يرحمك يامه

سبتيني في زمن هلفوت

لكن أبويا بقي

إللى قضي حياته شقا

وكان فقير علي القد

لكنه راجل جد

عمري ماشوفته في يوم

جايب في سيرة حد

وكان تمللي يقول

الطيبات لله إعمل عمل تلقاه

الدنيا مش بتدوم

أهو راح ومارجعشي

وخيرنا أخده معاه

دلوقتي ماعدشي بيت

إتقسم ٢٠٠ حته

الحته ٧ أمتار

وإنفضت اللمه

سابوه هنا ضلمه

حتي حيطان البيت

شالوها ب الحفار

سعيد الضو