زجلية تحت عنوان:
هكا الله بغاك***
هكا الله بغاك
اخلاق وحشمة
دين وزين علم وهمة
ومن دعاة الجهل سبحانو نجاك
هكا الله بغاك
في الظلمة فتح ليك باب
باعدك من أهل الفشل والجراب
زادك همة ك الكَمرة ضواك
عطي للجاهلين العبرة
لي بغاو يردو لمرأة سلعة و عورة
علميهم ان العلم طريقك ومناك
اسيدي ذيك الدونية
لي طحتي فيها نتي ونتية
سبابها مخ خامج منهاك
ما حد نهاك
لمربي من عند ربي
قولي للطبالة دربكم ما هو دربي
المرأة الحرة الرزانة والنضج واياك اياك
من ذيك الخطط الجهنمية
باسم التمدن والتفسخ والحرية
قلع وتادك فراك غ واهم فرناك
ما تقرا علي ذاك الزبوري
لكلام لمخندش واللسان هدوري
انا عقل وذات ما شي لعبة حشاك
واش عاجباك الذكورة
انت غ أجندات ودسائس مقبورة
والكبث والجهالة وشماك
انت الناقص ماشي انا
كاملة مكمولة يا دبانة
ملكة ؤ ما يهمها حسابك يالأفاك
ما أنا ناقصة ما ليك متعة
ما بضاعة ما في الدروبة صكعة
ميزني الله برضاه وانت على قد نيتك جزاك
هاذي هي لمغربية
لعطاء والتحدي والجدية
صالحة مربية ؤمن الله مهدية
ودعاوي لخير موصولة لمن علمك وقراك
بل الشكر والتقدير ل لتعبوا عليك سنين
رباوك على طريق لخير هما لولدين
ؤ ذاك البو لحنين لي عاش نقي ؤرباك
هكا الله بغاك
عن لمسخ ولفسخ بعدك
بين دعاة الغفلة نصرك ورفعك
كنتي درس ل من غ قينة بغاك
خليه يموت في مكرو وشرورو
غدا لحال ما يبقى على حالو راه عقلو زيرو
نعاودو لذاك الجاهل التربية…
ؤ تكون اللعنة سواك
فنوضي يا الشابة ؤ بدلي لعقلية
بالعلم تعلاي ؤ ما تطيحي في الدونية
ديري لعلم ولعلوم وسادك…
والعفة فراشك وغطاك
هكا الله خلقك وهاكا بغاك
باش تهزمي دعاة الانحلال
ل تحكموا في لحال جهال
في البحت والمعرفة تبحري…
علمي ذاك لرخصك الدرس…
خبريه ان في الحاويات مأواك
الشاعر والزجال: احمد الكندودي *** المغرب *****
ترانيم بحة الناي 