التوتة والساقية
وأغاني الفلاحين
من الفجرية معاهم
زقزقة العصافير
الكل رايح يشتغل
من غير حزن من غير نكد
كل ال في باله زرعته
يسلم علي جاره
ازيك ياعم عبده
ازيك يا عم حمزه
يارب تكونوا طيبين
لا فكر في العولمه
ولا في سعر الذهب
أو حتي رصيده في بنك
أو يربط شهاده لكل مية الف
كل همه يشوف زرعته بتكبر
تكون نظيفة تكون جميلة
طبعا كل ال فات كان زمان
قبل ما الفلاحين ما يتفرنجوا
وكل واحد بقي في السياسة
فشر خريجي علوم سياسه
وكمان منهم جماعه
كل حديثه عن الكوره
مين هياخد دوري مين هيصعد
و مين هيهبط
تقلش سيادته محلل رياضي
يتكلم كأنه خريج ملاعب
كوتش كبير بياخد ملايين
ياعم ارحمونا بقي
وكل واحد يلعب في مجاله
فلاح يزرع أرضه
معلم يعلم ولاده
صنايعي يشوف صنعته
أو حتي تاجر يباشر متجره
ساعته بس هتلاقي
كل حاجه بقت كويسه
من غير شطاره اوفهلوه
هي الحياة عاوز تعب
زي ما علمونا زمان
من زرع حصد
مش كده وال إيه
أكرم كبشة
ترانيم بحة الناي 