قصيدة بعنوان

(قوم؟؟؟؟؟؟؟!)

قوم في نص الليل

وصلي لك ركعتين

لو هم الدنيا طايلك

إدعي وإذرف دموع

وسيبها تنزل على

خدودك خليها تكوي

إبكي بحرقه ونهنه

وقول آمين 

قول آمين وكررها

وأوعى تمل منها

ياما نجت مسلمين 

كانوا زيك في حوجه

ليها بعد ما خسروا

سنين……….

عرفوا بعد أيام.

فاتتهم إنهم كانوا

مقصرين……..

عرفوا إن ليهم رب

يعبد بيستجيب

حتى لوكانوا مذنبين

قوم في نص الليل

وصلي لو همومك

معكرا صفوك وحملها

فوق كتافك صلي

وإرميها على المولى

هتلاقيها فكت معاك 

لو بتعاني أو حزين

إزاي متسألش فيه

إل خلقك إزاي يسيبك

هو أدرى بظروفك

بس لو صليت يا صاحبي

إحكي له على ال بيك

فضفض وقول يارب

 محتاجك تفك كربي

وتزيحها عني وتعطيني

 وتكون معين.

دا إنت ربي وإنت سندي

إفرجها يارب إفرجها

بعد العسرة يسرا

وقول آمين…….

السعادة موصولة بيده

والراحة إنك تزيده 

من دعاك وتترجى فيه

ياما زيي وناس كتير

عاشت في تيه

الكلام مش لي وحدي

ليك وليه إل له رب يعبد

ممكن يعدي على الموجه

ماشي بدون مايغرق 

ال معاه ربه أدرى بيه

 زي ما نجى موسى

 بعصايته وشق البحر

عشان يعدي

في لحظة البرق يعديه

قوم في نص الليل وصلي

لك ركعتين…….

وإرفع إيديك جرب وشوف

إحنا فيها صدقني هايراضيك

قول يارب ملناش سواك 

ولا لينا غيرك إنت عالم

 بأسرارنا وما نخفيه

 لو في ضيقه أو في

شدة أو حاجات مزعلاك 

أو حياتك موتراك

أو في أشياء محيراك

أو حبيبتك معذباك

أو قلقان والدنيا ضدك

كل دول هايكون وراك

بس لما تقوم وتصلي

وتدعي ربك إبكي

إبكي وقول له محتاج لك

وكن صادق في

دعاك…………..

وقول له على ال ظالمك

وال حرمك 

وال هجرك 

وألمك وجفاك

 تركك لوحدك وقت

حوجه وقام رماك…..

كنت حابه وهو كرهك

كنت تفديه بعمرك 

كنت بدايته وكانت

نهايتك بإيديه

ياريت فداك  

 إحكي له على بيك 

هو قادر يرد تارك

بس أحسن خليك مسامح

وإدعي ليك وله من قلبك

قادر ربك يستجيب

قول آمين……..

بعد طرفة عين وإنتباهتها

تتغير وتنقلب

موزاين وربك

في لحظه يبدد العتمه

و تبقى نور

وال كان طول عمره داين

في ثانيه يكون

 مدين………

وال كان طول حياته ضدك

يشيلك ويكون 

معين سبحانه أدرى

بعباده 

قوم في نص الليل وصلي

لك ركعتين…….

5/5/2023

(ترنيمات وخواطر /بقلم…………..)

(شاعر العاميه/خيرى حسنى…….)