*****(( نَكبة فَلسطين))*****

 

النَكبة صارَت والزَمن غَدار

لِبيوت خِربَت هَدموا الاحجار

تهَجَروا السُكان في فلسطين

وتيَتموا الاطفال كانوا صغار

والقَتِل يَلي صار جَنب العين

نالوا الشَهادة بعَزم وبإصرار

زعل الجَبل والتل والياسمين

مُحتَل جاب الموت للاحرار

شَعبي من النَكبات ما بِلين

الشَعب صامد والبحر هَدار

عا طَرَف بَلدِتنا الصَبر والتين

وزيتون عاشِق كلمِة الثُوار

نِحنا شَعب للابد مِتِحدين

ما بِفَرقنا حاكم وسِمسار

للارض نِحنا دائما راجعين

الارض إلنا نحنا مش زوار

لو تِعرَفوا شو صار في تشرين

هَبَت عواصِف كُلها أخطار

النكبة صِعبة نِحنا مش ناسين

زِعل الورد والزهر والنوار

المعركة صارت جَنب جِدين

والقَلعة عَمَ تِحفَظ الاسرار

والبعنة حَمرا مزَيَنة تِزيين

ثُوار فيها ما بِهابوا النار

قالوا هوية حمرا بالتلوين

وافق عليها البيك والمختار

فلسطين يا جَنة ليوم الدين

ترابِك اللي حاضن الابرار

فلسطين يا تاج الشَعب عَجبين

ما بتِنحَني إلا الى الغَفار

أسوار عَكا ويافا مع حِطين

والاقصى بشهَد لَكِ والجَزار

النَكبة عُمُرها خَمسة مع سبعين

والغَرب دَوما بِدعَم الاشرار

السما بكيَت والدَمع كله حنين

دار القَتل والجار يحمي الجار

بَيي بِكَفه حامِل المَرتين

يِرحم أبوي الثائر المِغوار

بَيتي من الاحجار مَعه الطين

أغلى من الالماس أعلى عيار

قَلبي بِحب الشعب بِفلسطين

ذَرة ترابِك أغلى من دولار

..بقلمي..ياسين مصطفى بكري….