الشعر أمانة

 

بكتب من قلبي الشعر 

وحاول أصيد معانيه .. 

علشان الناس تعرف حسنه 

وتعرف إيه مخبِّيه .

الشعر حياة 

الشعر وجود 

الشعر صديقي اللي أنا واثق فيه .

شايل على كتفه دموعي وأفراحي

وبعرف إمتى وفين وإزاى 

ألاقيه .

الشعر مرايتي اللي رسمت 

عليها ملامحي وشكلي 

وعمري وكل الحب 

اللي أنا بحكيه .

تعرف منه إن أنا فرحان 

لما تلاقي الجملة ف شعري 

كأنها لحن الكون يحكيه .

أو تعرف منه إن أنا غضبان 

أو ثاير 

أو زعلان على حب 

صبرت عليه .

ولا قادر أخبي دموعي 

ولا ناسي حكايتي مع اللي 

ناسيه .

أو تعرف صبري على الدنيا 

ومآسيها 

وتفهم خوفي من اللي غلبت 

أداديه .

عارف إيه الشعر ؟

الشعر ده عمري اللي أنا بحياه 

واللي أنا بسهر لياليه .

م هو زي الشمع بيحرق نفسه 

عشان غيره تنوّر لياليه .

أنا بكتب كل اللي بحسّه 

وكل اللي أنا خايف يبكيني 

ويبكيه .

الحرف أمانة بصونها بصوت الشعر

وبعرف صوتي إزاى توصلّك أفراحه

ومآسيه .

تقرا قصايدي فتعرف ذاتي 

وتفهم حزني 

وتفرح زيِّي بمعانيه .

 

بقلم الشاعر السيد العبد