منين أجيب ناس مخلصين 

وفين ألاقي الأوفياء 

الأنقياء 

الطيبين .

وأدِّي سِرِّي ، 

لحد يحفظ سِرِّي 

يستر عيبي 

يجبر خاطري ، مين ؟ .

خايف أقول 

أهو راح زمان الصدق .. 

أو فات أوان العِشرة .. 

أو هان علينا الحب .. 

فاضل أدوَّر ع الأمانة والأدب 

باقي أفتِّش ع المروءة والوفَا 

والصدق

بين الميتين . 

فتِّشت ف قلب الغريب 

قبل الحبيب

قلب العدو وقلب القريب 

مش لاقي صدق ولا محبة 

ف ربنا

الكل عاوز مصلحة .. 

ولمّا تيجي المصلحة .. 

يغور معاها الحب في دقيقتين .

طب فين ألاقي الصدق 

فين ألقَى أنا الراجل الأمين .

أشكي له همي يخففه 

وأقول له سِرِّي فيحفظه 

أخلاق كريمة وقلب صافي 

وعقل زينْ .

تسمع كلامه ف قعدة واحدة 

تقول عليه 

عِشرة سنين . 

بس اسألوا لي 

فين ألاقي الناس اللي 

الأمانة طبعهم مِش 

متلوِّنين 

لابسن قناع الحب 

بس بيظهروا خاينين .

وتعالو م الأول نقول :

ليه الضغاين والمكايد والشرور 

ليه المواجع والبلايا والغرور 

ده أكيد 

عشان م المستحيل 

هتلاقي واحد م البشر 

م الطيبين المخلصين .

وجّهت وجهي إليك

 يا رب العالمين

ترزقني من فضلك 

وواسع رحمتك

صاحب جدع صادق أمين .

بقلم الشاعرالسيد العبد

بتاريخ(٢٨)٤/٢٠٢٣/