الحب .. الأولاني .. !!         

 

حبيبى .. لما غاب ..

راح طول .. ف الغياب 

ولما افتكر .. فيه حساب 

قام … راح … ونسانى .. !!

 

والحب ف قلبى .. داب 

م الشوق .. والعذاب

ورغم إنه .. الجانى 

فاتنى … ولا .. جانى .. !!

 

وآل … إيه .. 

زعلان منى .. ياما 

والحسرة .. والندامة 

ساكنين .. ف قلبى ..

من سنين

والسهد .. والأنين 

ف عينيا .. الدبلانين

والرقة .. والحنين 

ماليين .. القنانى .. !!

 

رحت ابكى بدمع العين 

وقولت .. حبيبى فين .. ؟!

وفين الحب الأولانى .. ؟! 

وف يوم .. لقيته جاى ..

راكب .. ف التورماى

وبيعزف لى .. ع الناى 

قصيدة .. كات جميلة

من قلبه الحانى 

متزوقة .. بألحانى .. !!

 

جاى .. بالورد والأمانى 

ومعاه .. كوباية شاى

شرب منها .. شفطتين 

وجاى يبكى .. بدمع العين

قالى .. حقك عليا

ومسكنى .. من إيديا 

ساعتها نسيت 

أنا مين .. ؟! 

وقلبى راح .. مني فين .. ؟!

ف بحر .. من أمانى .. !!

 

والدمع اللى جارى ..

من عينيا .. السهراين 

وهمس لى .. بحرفين 

لقيتنى ف دنيا تانية

عمالة .. تلف .. بيا

دنيا جميلة … وردية 

وضحك لى .. زمانى .. !!

 

وعدنى .. بكلمتين 

متحنيين .. بالحنين

وقال لى .. يا نور العين 

انت بس اللى .. ليا 

ف الدنيا الحلوة .. ديا

ومن ساعتها .. وانا عايش ..

ف دنيا متوهانى 

بالفرح .. والأمانى

ف بستان حنية

ولقيت العمر بيعدى ..

من تحت رجليا 

ف أقل .. من ثواني .. !!

 

ولقيت نفسى فرحانة

بالمرسوم ع الجبيبن 

قلبين .. منورين 

مزروعين .. بالياسمين 

فدادين .. من حنين 

ولقيت روحى هيمانة ..

ف الحب مش دريانة

اتاريها .. كات غرقانة .. 

ف الحب .. الأولانى .. !! 

 

لقيت قلبى ..

مش … هو 

وسألته .. 

ع اللى جوا …

من زمان ..مستخبى

عن اللى كان ..

من يوميها ..

بيلعب بى 

قالى .. دا انا دايب 

من يوم ما دقنا ..

حضن .. الحبايب 

ورحنا سوا ..

ف دنيا حلوة 

سمعنا فيها .. أحلى غنوة 

دوبنا فيها ..

بهمس الشفايف

بالورد … والأغانى .. !!

 

وانا اللى كت خايف

أدوق .. القطايف 

من شفايف 

هايمة بيا 

سلمت للحب .. أمرى 

ومن يوميها ..

وانا .. بجرى ..

ورا قلبى .. اللى دايب 

وزايد .. من ساعتها

ف دقاته ..دقتين ..

واحنا …

آل .. ايه صبحنا ..

ف الحب .. دايبين 

ف بحر .. من محبة ..

ونهر .. من حنين

ف الحب .. اللى الأولانى .. !!

 

الشاعر / منصور أبوقورة