وسافرت 

وقلت أبعد عنه وأهجر ذكراه .

يمكن أنسى رسايله 

وأنسى قصايده 

وأنسى لقاه .

 

وسافرت 

لأبعد حتّـة من الأرض وقلت :

يا ريت أنساه .

ولا عدت بشوف في الحلم ملامحه

ولا عدت أستنّى الصبح لقاه .

ولا عدت ف كل جنينه 

أستنى معادي معاه .

أنا كنت يا إمّا بشوفه 

يا إمّا بقابله 

يا إمّا براسله 

يا إمّا بدوَّر على صوته 

ومش بنساه .

 

أنا كنت حبيبته وبنته وأمه 

وكل حبايبه 

وبدر سماه .

أنا كنت بشوفه أكَـبَّر 

خايفة لأحسد حسنه 

فقول : الله الله الله .

 

سبحان مِن صوَّر حسنك 

سبحان مِن خلّاك في عيوني 

جميع الناس ، ويمام الحب ، 

وسِرّ العشق ، وشهده و ذكراه 

 

خفت الحب ليكوي ضلوعي 

وخفت الأشواق تحرق قلبي

أخدت قرار إني أبعد 

مش عاوزة ألقاه . 

 

لا أنا طايقة بعاده 

ولا راضية يدوِّب قلبي لقاه .

 

وسافرت وفاتت أكتر من عشرين

سنة ف الغربة 

وتسألني أقول أهواه .

 

ولا عمري نسيت صوته 

ولا لحظة ضحكت لغيره 

ولا مرة جفاني ضِياهْ .

 

عشرين سنة فاتت 

وأنا لسّه صبيّة بتحلم بحبيبها

وتصحَا تنام ، وحنيني كتابْ  

ـ واللهِ ـ الأعلى ـ عظيم معناه .

 

بكتبله رسايل وأشيلها 

وأشتري مِن كل مكان هداياه ، 

 

عارفة إني راح أرجع ليه تاني 

ويحضنِّي وأبكي وأضحك ويَّاه .

 

لسه بشوفه يغِير لمّا ألبس 

ويشوفني جميلة .. 

يقول ١٠٠ آه .

إيّاكِي يشوفك حدّ جميلة 

إلّا أنا 

يا أغلى أمل ، وأرق حياةْ .

 

سِبتك 

لكن كنت معايه ، سامحني 

أنا مش عارفة القلب 

الوقت إزّاى قسَّاه .

 

أنا عارفة إنك مش حابب 

تسمع قلبي وتعرف إيه 

شكواه .

 

وأنا عشت ف ضلمة سنين 

وقصايدك نور أنا عَشْقاهْ .

 

وعتابك أصعب م الأيّام

وسؤالك عني يساوي

اللي أنا مش شايفاه م الحنّة 

واللي أنا شايفاه .

 

هرجعلك .. م أنتا واحشني 

يا ريت تغفر 

أنا قلبي أسير في هواه .

 

ولو إنتا السّـجّان أنا راضية 

مادام على باب السجن 

الضَيَّ المعشوق وبَهاه .

 

يا أبو قلب كبير 

أنا جايَّالك 

عارفة البدر لا يمكن يحجب عني

ضِياه .

 

عارفة إن الورد لا يمكن 

يضحك إلّا وروحي معاه .

 

عارفة إن الطير 

مش ممكن يصدح .. 

غير لمّا يوافق قلبي غُناه .

 

أنا وإنتا مش اتنين 

لأ ، واحد 

وإن كان الهجر هلاك

فالبعد حياه

بقلم الشاعر السيد العبد