……(الأرض قبل القوت)……

ياموزعين البارود 

على صفوف الوجود

حالف بعهد الله

نصر وفيه الخلود

سبع سنين فاتوا

وعيوني فيها ماتوا

بتقول لي قوم هاتوا

الأرض عنها وزود

إرفع دماغك بقى

كفياكوا عار في اللقى

أصل الجهاد في التقى

والنفس رافضه تجود

شوف اليهود في جحور

زارعين قلوبهم بور

ممنوع يناموا ف نور

تحت جلودهم دود

سبع سنين ف هموم

إرفع سلاحك قوم

كبر في وقت الصوم

للخيمة انت عمود

عدي الكنال يابطل

حررني م المعتقل

انت اللي فيك الأمل

صاحب العطى والجود

وحياة إله السما

وان شالله أشوف العمى

هتعودي عز وهنا

والعزة مالها حدود

إبنك وحالف أنا

يدفع عدوك هنا

الروح أو ربما

مبتور وبتره يسود

فرحان سمعت الخبر

فوجي في أول عبر

من صبري ياما صبر

كان للسلاح مردود

بارليف وأصله فجر

بالماية داب وأنتحر

كان زي ورق الشجر

والمايه ريح في سدود

ع الضفة كان العلم

ينده ويروي القمم

ويشد فينا الهمم

على السؤال له ردود

تكبيره خدت الصوت

خدت اليهود في تابوت

والموج بيفني شطوط

ومن الكنال بيفوت

وعدونا في جحور

مرعوب عليه الدور

يرمي السلاح ويدور

يصرخ بلاش الموت

سينا عبيرها وجاه

في الرمل عز وجاه

ساعة العبور محلاه

والفرح في الملاكوت

ريحة رمالك فل

فيها الشهادة تطل

والنصر راية الكل

قبل الحياة والقوت

يوم العبور عيشناه

والأرض جايه معاه

كفيانه بقى مواساة

وسنين أعيش مربوط

أول جيوش الكون 

فيها الخطط واللون

مصري وعشقه جنون

معقوله أعيش مضغوط

علمت كل الناس

وكتبت في الكراس

الأرض ليها مقاس

والروح عشانها تابوت

في يوم العبور بطولات

رجالة ليها حكايات

عشق الوطن له آيات

مهما العدو طاغوط

ع الضفة ياما إترسم

بالدم وقت القسم

أرواح وبيها إتحسم

النصر بعد الموت

ومن اليهود طوابير

قائد وشكله كبير

عساف ياجوري أسير

وقعوا كاورق التوت

والنصر كان برواز

بالدم يومها وفاز

والمصري رفع الراس

والأرض قبل القوت

………(شعر)……….

عبد الله السايح