((لعبة حظ))

شخط ونطر وإلام بالجوز

والحق بيهرب ولا فرقع لوز

أيام ولا يعلم بيها

إلا اللي خلقها ومشيها

واهو فينا اللي مكفينا

والفقر بِينخُر فينا زي السوس

حالة غريبة تايهين فيها

وبغباوتها فاردة نفوذ

احتارنا معاها.. وويّاها..

والعمر أهو راح في هواها

والطلبات عكس مبنعوز

قايمين بيها وشايلنها

بس خسارة ولا فهمينها

دي العيشة مش بس فلوس

وان جينا نفرفش ونلونها

نرسم أحلامنا وندوّنها

تضغط علينا أوي وتدوس

وبقساوتها تذل نفوس

وتعاتب نفسك ليها وتلومها

خليك متخبي كده في هدومها

دي لعبة حظ

وانت المنحوس

هقولك حاجة كمان واسمعها

غيرك بعها ولا همه وجعها

وعينيه قفّلها وشمّعها

وبياكل فينا زي الموس

وان قولت تسافر حتى بأحلامك

ممنوع من سفرك

أيوة يجوز…

وهتسغرب ليه !!!

طول ما انت يابيه

عامل فاهم وكمان فلحوس

ختم وجودك أصلاً.. مش موجود

والبنزين وياك محدود

حتى طريقك بالزور مسدود

ولحد أمتى مش محسوس

قولت لنفسي ازي تتشاف

طول ما انت جبان أو بتخاف

هُمَّ يادوب سبعة عجاف

ونولع شمعة وبلاها فانوس

واضحة يا ناس من غير تعليل

قالولي حاسب بلاش تهبيل

بطّل تخريف بطّل تطبيل

وانت أكيد علينا مدسوس

خليك راكب فوق أوهامك

يمكن في الآخرة توصل وتفوز

صالح نفسك دلّعها

واضرب أيامك ولّعها

وبشقوتها اوعى تحوس

انسى سنينك وانسى وجعها

وواعى في يوم تضربلك بوز

امسك حلمك واتعلّق بايديك

يمكن تصحى في يوم تلاقيك

على الحبل بتلعب أراجوز

أحمد الغرباوي