((مش هسمحلك))

امسح ياصحبي دموعك

وهدي نفسك مهلك.. مهلك

ليه تبكي على ناس باعوك

وانت بطيبتك فاكرهم أهلك

فارقوك حتى ماودعوك

ولا عاد فيهم قلب يشتاقلك

غرر بيهم زمانهم وفاتوك

ولا عاد فيهم اللي يستاهلك

فوق ياصحبي ليضيَّعوك

واسمع وشوف مين بيليقلك

ليه تخلي يوم الجرح يندهلك

فوت الجرح فوت الوجع

وارمي الآسى ورا ظهرك

كفاية قلبي فيك إتوجع

أصيل يا صحبي من صغرك

فاتت سنين السماح والدلع 

خسارة فيهم نبلك وطهرك

الطيور على أشكالها تقع

وانت فى العلا شكلك

امسح يا صحبى دموعك

بعد النهارده مش هسمحلك

بيع اللي باعك

واشتري اللي يلبقلك

أحمد الغرباوي