…….(لخابيط)……/

آه ياوطن متهان

لخابيط وبالالوان

كل السما دخان

كل العيون بتنام

ومفتحة الأذهان

موازين وفيها ميزان

بيوزن الأوهام

والباقي في التوهان

تايه مع الاحلام

كل الحجارة ستاره

كل السقوف من نشاره

لازراعة ولا تجاره

والزرع للغربان

دموع مع روقان

وضلوع كاسرها لسان

وعقول ماتعرف كام

ظلم وكان إنسان

وبلطجي غلبان

وفقير يبيع دبان

والقتل بالأديان

والسجن للسجان

وحمام قالوا غربان

تعابين تصاحب جان

وبنات قالوا صبيان

وسدود على حرمان

مضروبه في القبطان

وسليم قالوا عيان

والشيخ زرع شيطان

والهم للجدعان

ياأمة دون أوطان

ياأمة الأيتام

لموا الفلوس برهان

واعطوها للعدوان

يحميكوا أي كان

ياحقوق في كل زمان

الحق أكذوبه

عايش وفي الروبه

محتاج له أعجوبه

يمكن في يوم هيبان

كل الليالي سوده

خرج القمر م الروضة

ونجومه حبس في أوضه

والبدر فات له أوان

والشمس مصلوبه

والكلمة مقلوبه

والتوبة متأوبه

فيها حلق وودان

لكن تجيب إنسان

صعب يكون في مكان

وان بان يكون عيان

فيه المرض ساكن

والظلم فيه راكن

والحرف لون داكن

وان عاش يعيش متهان

ياحرقة الأوطان

مسكونه ظلمه وجان

والباقي تحت الطين

ميت كتير عارفين

والباقي مات ساكتين

سكتة حقوق وبلين

ياخسارة الحلوين

فرحة وطن تايهين

من يوم ماكان حطين

إتغيروا بملاعين

وهاجين وراكبة هجين

والوقت فات عارفين

وخسرنا دنيا ودين

……..(شعر)………

عبد الله السايح

…………