د/عبدالمنعم الفقي

……

طظ الف طظ

…..

أوعي تيجي تقوللي 

إنك أبن حظ 

كل شعار في الدنيا

دي له شعار مرفوع بطظ

لو بتطلب أي حاجة

في أي حاجة من الشرف

لازم تبز

كلمة حلوة …لقمة حلوة

رقصة ..غنوة

وإن قالولك تبقي قرني

أبقي …قرني 

أوعي منهم يوم تشذ

إن قالولك كون مرايه

كون مراية

وإن قالولك كون عباية

كون ملاية 

حتي لو أصبحت قرد 

بشورت جينز

وأمشي في درب اللاجاجة 

والدباجة لأجل تصبح أبن عز

وألا تصبح من رجال فن السياسة

أحلي ماسة

لك مهابة ولك كياسة

في بلاد أبن المعز

وأما ترسم فوق جبين 

راسك غباوة

راح تشوف الدنيا 

في عيونك حلاوة 

وشيء يلذ

وأوعي تسمع أي حاجة

تروح تقولها

ولا تدخل بوابة شرف

ممنوع دخولها

وألا تصبح مستفز

وأوعي تنسي تطاطي جامد

في المحافل والموالد

لأجل تكتب مجد خالد

يبني كنز 

سيب أمورك تمشي عادي

في التبجح والتمادي

وإن قالولك هز …هز 

حتي لو أصبحت 

كاس كونياك معتق

أوعي تزهق

أو تنسي تقوم تمز

المهم تكون مدردح 

واد مفتح 

وإن ضميرك هب ينقح

قوله طظ …كله طظ

وألف طظ 

….د/عبدالمنعم الفقي..