يارب صبرني ….بقلم الشاعر د.عبد الرحمن فتحي الحناوي 7 مارس، 2024 بواسطة souadchahidai كتبتها رثاء لزوجتي التي توفيت يوم السبت ٣٠ / ١٢ / ٢٠٢٣ بلسان حال ابنتي التي لو تكلمت لقالت : ( #يارب_صبرني ) ١ – مش حاقدر اقول ماما تاني دي حروفها واقفه على لساني أنا خايفه من غيرها أعاني أمي اللي غابت وسابتنا وروحها لحظه ما فارقتنا صورتها دايما قُدّامي وهِيّا بِتْوٌصي وصايا ٢ – أمي يا أملي ونور عيني يا أجمل ذكرى في سنيني إزاي أعيش َانا من غيرك وانا كل يوم عايشه ف خيرك أهديكي شوقي ودعايا ٣ – غبتي ورحتي بعيد عني كنتي بتاخدي بالك مني وكلامك كان بيطَمٌني من نظره واحده بِتَأني بتحسي باللي مآلمني و بتعرفي إيه جوايا ٤ – كنتي قريبه قوي مني عمرك ما خيبتي ظني كنت اجري ازقطط وأغني حاسه اني اكبر من سني ما يهمنيش إنس و جنى برتاح كتير وانتي معايا ٥ – خلاص لساني ما بقاشي يقول يا ماما بإحساسي الحزن ساكن فوق راسي والحيره دايره وانا فيها دي نار وكنتي حتطْْفيها وتشيلي همي وأسايا ٦ – كلامك الحلو معايا حاسّاه دوايا وشفايا نظرة عينيكي دي كفايا وحضنك الدافي غذايا يارب في الآخره ارضيها دي هِيّا أملي ومنايا ٧ – مش عارفه اكمل من غيرك رغم اني غرقانه ف خيرك كان نفسي أشكي واحكيلك واحط راسي ف منديلك إبكي وإنتي تهَدّيني وتمسحي دمعة عيني النظره منك ترضيني فداكي دم ف شراييني كان نفسي تتهني معايا ٨ – عمرك ما كنتي بتنسيني ما بين إيديكي بتاخديني وتحسي بيا وتِرْقيني في لحظه غبتي وسبتيني مين بس غيرك يراعيني يا أجمل قصه وحكايه ٩ – من قلبي دايما بدعيلك تتهني من بعد رحيلك يسعد سنيني وسنينك يرضيكي ربي ويرضيني يا شمسي وضلي وهوايا ١٠ – حياتي اتغيرت بعدك مفيش في الدنيا دي زيّك كان خدي دايما على خدك أسأل ويعجبني ردك ولا لحظه عمرك نسيتني يا نجمه ساطعه ف سمايا ١١ – جبال الصبر من بعدك دابت عشان حاسه ببُعدك أنا ليلي نهاري بشتقلك وياما احتجت انا لرايك كان نفسي تيجي تضميني بفرح قوي وانتي معايا ١٢ – أشوف سريرك دا قصادي أقول ياربي أنا راضي مش قادره أشوفه كده فاضي ولا قادره امشي الناحيا دي مين بعدك انتي يسليني صعبه عليا السهرايا ١٣ – صورتك بشوفها واتألم واحزن واقول إبكي يا عيني أخلاقك الحلوه تعلّم الدنيا كلها وتعيني وتساعدي من غير ما تهيني يارب سمّعْها ندايا ١٤ – الدنيا ليه قاسيه عليا حرمتني أعز ما ليا أمي يا نَوّارة بيتي بنتك يازين ما ربيتي فين انتي صعبانه عليا أكيد مكانك مش بينا مكانك عالي في الجنه يا رحلة عمر كات آيه ١٥ – أنا أمي دي أفضل نعمه ووجودها نَوّر لي حياتي روحها أخف من النسمه على بالي دايما ويوماتي يارب هونها عليا وتكون الجنه لها غايه ************************** بقلم د / عبد الرحمن فتحي الحناوي. من مصر. الأربعاء ٦ من مارس ( آذار ) سنة ٢٠٢٤ شارك هذا الموضوع: المشاركة على X (فتح في نافذة جديدة) X شارك على فيس بوك (فتح في نافذة جديدة) فيس بوك إعجاب تحميل... مرتبط
ترانيم بحة الناي 