………..(نهر الغرام)……….

عشق عشقتك ولا حسيت

قلبي وراك يقول حبيت

واستغربت كتير عن حالي

لما غرقت ماقلت ياريت

لما لقيت الورد الميت على أغصانه

فتح الجفن عيونه وبانو

فجأة وحضن الورد عيدانه

حس بفرحي وبه حسيت

حتى الحزن الساكن بين أضلاعي

اللي تملي يحب خداعي

واللي تملي وكان لي الراعي

سابني وسافر لابعد بيت

لما لقيت الليل فرحان

بعد دموعه وكان هربان

فجره كتب لي أحلى بيان

لما ضحك لي عليه رديت

شاف الشوق مزروع في عيوني

قلب يدق يرقص كوني

فتح الحضن عشان يأويني

بين أحضانه وكنت سعيت

عشق معاه إتغير حالي

بعد الخوف لا يجيلي وجالي

كنت أشوفه ومنه أ داري

ياما وكنت انا منه أسيت

كنت زرعت قراري في قلبي 

نهر العشق مايوم يلعبي

ولا على شطة ومرة وأحبي

فجأة لقيته يفوت م البيت

بعد ماكان الليل خوفني

كان بدموعي تملي يشوفني

بعد العشق بفرحه عرفني

قلبي وحب الليل ونسيت

أعمل عقد نجوم على جيده

ونجمة حبي تملي ف إيده

قمري وكل نجومي عبيده

قلبه نده لي عليه رديت

شوفت الأرض وطرحها شوق

بعد ماكانت تطرح شوك

لو تعبانه تندي تروق

قال الندى بالحب وجيت

والعصافير تعزف ألحان

تغني وترقص ع الاغصان

ترمي بذورها حنان في حنان

تطرح حب حصاده لقيت

هي عيونها بنظرة صادتني

لمعت لحظة بس رمتني

بين أحضان العشق سابتني

لما سابتني بكل حنانها إتغطيت

لما بتضحك طرحها أخضر ع الشطين

لما بتزعل لؤلؤ نازل م العينتين

لما بتهدا جمالها بيبقى حنان وحنين

لما غزلت جمالها بغزله سعيت

بعد جمالها عيني بترفض أي جمال

بعد دلالها قلبي بيرفض شئ يتقال

بين أحضانها تشعر انه خيال في خيال

دنيا جميلة عايش فيها وإستكفيت

…………..( شعر )……………

        عبد الله السايح