2006/2/22 تاريخ استشهاد الصحفيه والاديبه الشاعره اطوار بهجت رحمها الله ..كتبت في حينه هذه الابيات ..

………………………

(وداع ذات الحجاب)

منكتب بگلوبنه اسمچ…اطوار 

ياحرّه اشغلاتچ

يل هويتي اجبال كردستان

..واهوار الجنوب 

…الوطن مرسوم بخيالچ

وي اذان الصبح اِديتي الفريضه

.. بحضرة الكاظم امامچ

العصر بالگيلاني صليتي 

النوافل  

..اسمعنه ترتيلة دعائچ

اعلنتي عل ارهاب ثوره

وبس قلم بيدچ سلاحچ

يل رحلتي ابعيد عنا بلا وداع 

…والله مو هيٌن وداعچ

أتعدت اعليچ النوايب

…والمنايه الخطفتچ

..چانت تهابچ

بالرمادي گلوب حزنت

بالعماره ادموع صبّت

….اتذكرت نبرت كلامچ

اتنومست بيچ الطوايف 

..انفجعت الديره بمصابچ

بطلعتچ درب الشهاده 

..اتنور ومرفوع هامچ

حور عين استقبلنچ

..طرّزن نقشة حجابچ

همه نفس الفجرو گبة

علي الهادي

بحقدهم .. گَطّعو ..زهرة شبابچ

……….

رياض نعيم الموزاني العراق 🇮🇶