شحال قدك …بقلم الشاعر أحمد الكندودي 20 فيفري، 2024 بواسطة souadchahidai زجلية تحت عنوان: شحال قدك*** شحال قدك يا لغافل ؤ طبعك مْفَبْرك هايم عاري غادي دافع كبير والجوف هاري ما صنتي عزة… وما لبستي قدك بل شاد في العُرش الراشي هاز زعما شي حاجة فياشي عايش لوهم لِ جلاك ؤ ما نفعك ؤ باش تغلب هوال الدنيا قنع نسى ذيك بع وبعبع شد لارض فهي فراشك وسترك حوط بجنابك ؤ شوف شحال راك غني إيلا كنت بقرش لحلال قانع ما تعاني زاهد نقي وحمد الله راه حبك عطاك لغالي ؤ ل ما يتشرى بمال الصحة زينة السترة وراحة البال وخا مالك غ نعالة فصون قدرك زمان قالو الطمع طاعون مرض خبيت وتلاوي فيه عربون تقضي لايام مخطوف… ؤمال الدنيا ما يقدك فشحال قدك وانت معلق فين تفلق فنوض وافهم الرسالة شد لارض ما لك تتعالى جمع لوقفة وتحرك حيد النقص وذيك الرجفة طعمك مر السليتي والخطفة انت سيد راسك لا غيرك فشحال قدك كذب هنا وترهط لهيه ضحك على هذا ولاخر غْريه داتك الغفلة وثقال حملك بنادم ما تزينو غ أفعالو لخير وصفا ولوقر موالو ما عجبو راسو باسل… وبمالو ما طغى ما تجبر شحال قدك ؤ انت زعما الفاهم المثالي كلشي عندك مَشْكل حيت حِيالي راكب لكلخة … ؤ حلفتي ما تفيق ؤزاد جهلك بل بغيتي حتى انت تعود عنتر تدير المال ؤ على بنادم تخنتر لعين فيها خشبة… والراس كدية محجر غ يفرنك عجبك الزواق والبروتوكول النفاق والتلاوي والقلب مسلول ما شدتي لجام… والوهم قهرك شحال قدك؟ *** الشاعر والزجال: أحمد الكندودي ***المغرب شارك هذا الموضوع: المشاركة على X (فتح في نافذة جديدة) X شارك على فيس بوك (فتح في نافذة جديدة) فيس بوك إعجاب تحميل... مرتبط
ترانيم بحة الناي 