زجلية تحت عنوان:

الدفلى ***

قتلوا لهوى…

ؤ مشاو في كَنازتو

دموع التماسيح بلية

بها مسخ ؤ فقد صباغتو

خربو جنانو ب لبهوت

وبالشوك حوطو زهراتو

فعلى اي حب ساير يا لغافل تهدر

ؤ انت سباب موتو وخلاتو

قتلوا لمحبة ؤبدموع لكذابة بكاوها

تحراميات وجوج وجوه عماوها

حتى خمجت بالنفاق غلاتو

لحب احساس يا لغافل ففيق

ما يعرفو شلاهبي سافل زنديق

وسخ عمرو تهرنيط وضاعت حياتو

عاش مرهط ولوجه مكري

لا عفة لا نقا غ تالف يجري

تايه في لغفلة…

 يتسنى نهاية ساعتو

هربات موجاتو

ذاك لوفا والصفا لي كان عماد

الرزانة والثبات والطيبة وتاد

هدموا خيمتو …

ولهايم الدنيا رماتو وتلفاتو

ما فاق ما عاش مْحَنة

اليوم راه يشهق شاد الركنة

فذيك الايام لخوالي ما نفعاتو

ما عرف قيس ولا عشق ليلى

داتو حملة لحال عاد يتلوى

مازرع لخير ؤ ما قاد خطواتو

ذوك أهل الطيبة حرقاتهم لعوافي

بات النقي الصادق مهمول حيت وافي

رابت لمروة في دواخل الريحان…

ولوعد بهات ؤ فْقَد صفاتو

ف بلا ما تشكي يا السايب وتبوحط

ما عرفتي نقا عشتي مغنط معنطط

لعب ؤ تلهى موضة…

والقلب ذبالت حالتو

بل ردوا لهوى عيد وسيرة

لغدر عجينتو والنية بقات فطيرة

والشناقة قتلوه ؤ مشاو في كَنازتو

ففيق يا بنادم واركب السلامة

شد في لوفا وصفا هما العلامة

صون لعهد …

و لذاك لوفا تذوق حلاوتو

قتلوا لهوى

ذوك قلوب الخش والرملة

علا شكاهم ؤ هما سباب وفاتو

ولعجب لعجاب

راهم غاديين في كَنازتو

بل ردوه دفلى…

ؤ عانى العاشق قهرو ومرارتو

 الشاعر والزجال: أحمد الكندودي ***المغرب ***